Japie se gunsteling: sitruspoeding met sy eie sous
Hierdie is die aangepaste weergawe soos dit in Kook en Geniet se hersiene 2009-uitgawe verskyn.
4 porsies
3 groot eiers, geskei
190 ml – 375 ml strooisuiker (afhangende van hoe soet jy dit verkies)
375 ml melk
100 ml meelblom
310 ml lemoensap
30 ml suurlemoensap
Gerasperde geel skil van 1 lemoen
Gerasperde geel skil van 1 suurlemoen (my eie byvoeging)
45 ml botter, gesmelt
Metode:
Voorverhit die oond tot 180°C.
Klits die eiergele, voeg die suiker daarby en klits tot lig en donserig.
Voeg die helfte van die melk by en klits tot die suiker opgelos het.
Klits die meel en dan die orige melk by.
Voeg die lemoen- en suurlemoensap, die skil en die gesmelte botter by.
Klits die eierwitte styf en vou in.
Skep die mengsel in ‘n gesmeerde oondvaste bak. Plaas in ‘n pan met kookwater en bak sowat 45 minute tot mooi bruin. Dit vorm ‘n fyn kors bo-op en ‘n sous onderin.
Wenke:
- Ek hou daarvan om dit met ‘n bietjie geklopte room voor te sit.
- Om die sitruskarakter te verhoog, klits marmalade by die beslag in.
Hierdie Kook en Geniet-poeding is vir die dag wat jy smag na die lieflike skerp karakter wat net suurlemoen kan gee, of vir die dag wat die lewe jou te veel suurlemoene (sonder lemoene) gegee het. Die poeding vorm ook, soos Japie se Gunsteling, sy eie sous.
90 ml sagte botter
320 ml strooisuiker
4 eiers, geskei
500 ml melk
125 ml meelblom
125 ml suurlemoensap
10 ml fyngerasperde geel suurlemoenskil
Metode:
Voorverhit oond tot 180°C.
Klop die botter en suiker tot romerig. Klits die eiergele en voeg by. Meng goed.
Meng die melk en meelblom om die beurt saam met die suurlemoensap- en skil by. Klits die eierwitte styf, vou in en giet die beslag in ‘n gesmeerde oondvaste bak.
Sit die bak in ‘n pan met kookwater en bak 45 minute lank of tot goudbruin. Die poeding vorm, net soos Japie se Gunsteling, sy eie sous.
