Vandag het ek sommer verlang na goeie ou tye op Fraserburg by Ma Maatjie se kolestoof. Sy was/is die baasbakster op die dorp gewees. Die kolestoof moes menige baksels beskuit gebaak het.
Ek het een of twee van haar resepte, maar vir ‘n boerbeskuit resep moes ek ‘n bietjie gaan soek en het ek hierdie een raakgeloop.
500g botter
500 ml kookmelk
10 ml sout
2.5 kg broodmeelblom
500 ml soetsuurdeeg – sien onder
smelt jouse botter in kookmelk, voeg die sout by en laat afkoel – ek sal so ‘n knippie witpeper ook bygooi. maak ‘n holte in die meelblom en gooi die insuursel en die loumelkmengsel daarin, meng tot ‘n stywe deeg, voeg louwater by indien nodig . knie baie goed en hou op ‘n warm plek. bedek nou die deeg met ‘n vadoek en laat rys tot dubbeld die deeg se volume.
vat die deeg in jou hande en rol die deeg uit in ‘n lang rol. plaas 2 rolle in elke broodpan wat jy met botter gesmeer en met meel geskud het, sit ook gesmelte botter tussen die twee beskuitrolle . smeer nou botter bo-oor en laat weer op ‘n warm plek rys. as die deeg weer dubbeld sy volume het, bak jy die panne teen 220 C vir 1 uur. toets vir gaarheid
keer uit en breek in stukke – ek onthou die beskuit sonder fieterjasies – dit het my aan skerp bergpieke laat dink – droog uit in ‘n koel oond
soetsuurdeeg
15 ml sout
15 ml goue bruinsuiker
250 ml kookwater
250 ml yskaswater
250 ml mieliemeel
250 ml warm water
gebruik ‘n diep kastrol met ‘n deksel wat dig pas. gooi die sout, suiker, die kook-en kouewater daarin en meng met ‘n houtlepel. strooi die mieliemeel oor. maak die kastrol dig toe en laat oornag op ‘n warm plek staan. die volgende more voeg jy 250ml warm water by , asook genoeg broodmeel om ‘n matige beslag te kry. strooi ‘n bietjie meel bo-oor en sit weer die deksel op. draai die kastrol toe in ‘n handdoek en plaas op ‘n warm plek. binne 1 uur behoort die deeg gereed te wees om te knie – gebruik die soetsuurdeeg mengsel in beskuit, maar moet dit dan nie te veel knie nie.
met die orige soetsuurdeeg moet jy maar brood bak. hoe verlang ek my ouma nou – kyk hulle kon knie , seker die dat die oumense sulke lelle onder hulle arms gekry het op hul oudag – was van al die knie as jy my vra.
(Resep van Neil Stemmet)
