Bone-en-groente-pot
Genoeg vir 6
Bereiding: 10 min.
Gaarmaak: 30 min.
15 ml (1 e) olie
2 uie, gekap
4 knoffelhuisies, fyngedruk
1 rooi brandrissie, fyn gekap
2 steranyse
1 kaneelstok
500 ml (2 k) groenteaftreksel
150 g droë appelkose, grof gekap
5 takkies tiemie
3 groot aartappels, in stukke gesny
1 patat, in stukke gesny
450 g botterskorsie, in stukke gesny
7,5 ml (1½ t) harissa-pasta
400 g cannellini-bone
’n hand vol pietersielie, fyn gekap
- Verhit die olie in ’n groot pot oor matige hitte, voeg die uie by en braai 5 min. of tot sag. Voeg die knoffel, brandrissie, steranys en kaneel by en braai nog ’n minuut.
- Gooi die aftreksel, droë appelkose en tiemie in. Bring tot kookpunt en verminder dan tot prutpunt, bedek en laat 5 min. prut voor jy die groente byvoeg.
- Bring weer tot kookpunt en laat kook nog 20 min. of tot die groente sag is. Roer die harissa, bone en pietersielie in. Geur na smaak en sit voor.
