Outydse melkversiersel
Vir die fyngebak-uitdaging het Mari-Louis Guy ’n romantiese koek ontwerp wat sy ontstaan het in ’n Persiese legende. So eksoties soos die “toot”-suikerlekkers en handgemaakte spookasem (engelhare) was, so eenvoudig was die outydse melkversiersel wat die lemoenkoek bedek het. Mari-Louis deel graag die versiersel-resep uit Ouma se kombuis met Koekedoor-kykers. Ander elemente van die Persiese liefdeskoek verskyn in die Koekedoor 2-bakboek.
Bestanddele
- 3 e meel (45 ml)
- 1 k melk (250 ml)
- 250 g botter (teen kamertemperatuur)
- 200 g suiker
- 1 t vanieljegeursel (5 ml)
- voedselkleursel (dowwe pastelkleure)
- geursel (indien verlang)
Instruksies
- Klits die meel en melk saam tot glad en plaas in ’n kastrol oor matige hitte.
- Kook tot dik. Skep uit in ’n klein mengbak en bedek met kleefplastiek – druk styf teen die “pap”. Laat afkoel tot koud.
- In die mengbak van ’n elektriese menger, klits die botter en suiker tot liggeel. Voeg die vanieljegeursel en die melkmengsel by. Klits tot baie glad, ongeveer 5 minute. Geur en kleur. Verkoel vir 15 minute.
