Corli se bobotie-pasteitjies
Die Koekedoor Corli gebruik Tannie Barbara van Australië se resep, maar maak dit ook haar eie. Probeer gerus dié heerlike bobotie-pasteitjies.
Bestanddele
Skilferkors (lewer 1 kg)
- 500 g koekmeel
- 2 ml sout
- 350 g botter (koud en ongesout – in blokkies gesny)
- 10 ml suurlemoensap
- 240 ml water (koue water)
Bobotie-vulsel
- 500 g maalvleis (beesvleis)
- 1 dik sny brood (wit- of bruinbrood)
- 1 l melk
- 1 ui (gehalveer en in klein blokkies gesny)
- 15 ml olyfolie (Olive Pride)
- 10 ml kerriepoeier (matig)
- 5 ml borrie
- 2 ml komyn
- vars gemmer
- vars knoffel
- swartpeper (na smaak)
- sout (na smaak)
- 10 ml appelkooskonfyt (fyn)
- 10 ml blatjang
- 15 ml witwynasyn (of suurlemoensap)
- lourierblare (opsioneel)
Instruksies
Skilferkors
- Sif die meel en sout in ’n bak. Gooi die gesnyde blokkies botter by die meel.
- Meng saam met die punte van jou vingers.
- Gooi die suurlemoensap saam met die water, meng dan by droë bestandele.
- Meng in met rondepunt-mes, deeg sal nog klonterig wees.
- Sit deeg op meelbestrooide werksblad, knie en rol vir paar sekondes.
- Rol deeg in langwerpige vierkant, maak toe met kleefplastiek en plaas in yskas.
- Na omtrent 15 minute, haal uit yskas en rol weer en vou in drie dele soos koevert, rol weer uit en vou nog ’n keer.
- Sit in yskas en laat koud word.
- Na 15 minute kan deeg gebruik word vir pasteitjies.
Bobotie-vulsel
- Gebruik swaarboomkastrol.
- Week die bruinbrood tot sag in die melk. Maak die brood fyn met ’n vurk.
- Verhit die olie in ’n pan en braai uie, gemmer en knoffel tot sag en effens bruin.
- Voeg die kerriepoeier, borrie, komyn, blatjang, appelkooskonfyt en rosyntjies by en braai liggies vir sowat 2 minute. Haal die pan van die hitte af.
- Meng die maalvleis en brood in ’n mengbak. Voeg die uiemengsel en die res van die bestanddele by.
- Meng goed en geur met sout en varsgemaalde swartpeper.
- Braai als saam tot gaar en laat afkoel.
- Nadat vleis afgekoel het, maak bolletjies en sit in yskas of vrieskas om styf te word. Gebruik dan vir elke tertjie.
Maak pasteitjies
- Rol deeg uit en gebruik ronde koekiedrukkers om verlangde grootte te verkry.
- Plaas ’n bolletjie van vleis in elke deeg-sirkel.
- Gebruik een eier (liggies geklits) en smeer kante sodat dit kan toeplak.
- Plaas op bakplaat en verf dan liggies die hele tertjie.
- Bak vir omtrent 20-30 minute in oond teen 200˚C.
