Sjokolade-malvapoeding
GENOEG VIR 4-6 MENSE
Bereiding: 15 minute
Gaarmaaktyd: 30-40 minute
Kakao gee dié Suid-Afrikaanse gunsteling ’n heerlike kinkel.
POEDING
400 ml suiker
80 g botter
2 ekstragroot eiers
500 ml (2 k) koekmeel
7 ml (1½ t) koeksoda
10 ml (2 t) bakpoeier
50 ml (40 g) kakaopoeier
500 ml (2 k) melk
30 ml (2 e) asyn
40 ml (8 t) appelkooskonfyt
SOUS
150 g botter
300 ml room
180 ml (¾ k) suiker
Voorverhit die oond tot 180 °C.
Smeer ’n oondbak of spuit dit met kossproei.
- POEDING Klop die suiker en botter sowat 5 minute in ’n mengbak tot romerig. Klits die eiers by en klits die hele mengsel goed.
- Sif die meel, koeksoda, bakpoeier en kakao in ’n aparte mengbak.
- Meng die melk, asyn en appelkooskonfyt in ’n aparte mengbak. Voeg dit en die droë bestanddele beurtelings by die romerige eiermengsel.
- Meng alles baie goed en giet in die bereide oondbak. Bak sowat 30 minute of tot gaar.
- SOUS Meng intussen die sousbestanddele in ’n klein kastrol en bring tot kookpunt. Verlaag die hitte en laat sowat 3 minute prut.
- Giet die warm sous oor die poeding sodra dit uit die oond kom. Sit dit voor saam met roomys en vrugtepuree.
