Maklike hoenderpastei
1 gaar hoender
50 g botter
1 ui, grof gekap
2 selderystingels, grof gekap
1 groot wortel, geskil en grof gerasper
150 g sampioene, in kwarte gesny
40 ml meel
5 ml mosterdpoeier
250 ml room
300 ml melk
Sout en varsgemaalde swartpeper
40 ml gekapte pietersielie
100 g ertjies
400 g skilferkorsdeeg, ontdooi
1 eier, geklits
Voorverhit die oond tot 200 °C en smeer ’n groot oondbak met olie of spuit met kossproei. Verwyder ál die bene en velle van die hoender en sny die vleis in klein blokkies. Hou eenkant.
Verhit die botter in ’n groot pan en braai die ui, seldery, wortel en sampioene vir ’n paar minute. Roer die meel en mosterdpoeier by en braai vir ’n paar minute. Giet die room en melk by en roer totdat ’n dik sous vorm. Geur met sout en varsgemaalde swartpeper.
Roer die pietersielie, ertjies en hoenderblokkies by en skep die mengsel in die voorbereide oondbak. Rol die skilferkorsdeeg liggies uit op ’n meelbestrooide oppervlak en bedek die hoender daarmee. Druk die kante met ’n vurk vas en verf met die eier.
Bak vir sowat 30 minute of tot goudbruin. Genoeg vir sowat ses porsies. Wenk: indien jy nie ’n gaar hoender in die hande kry nie, bak ’n heel hoender (gourmet sout, peper, suurlemoensap en olyfolie) in ’n voorverhitte oond van 180 °C vir sowat 40 minute.
