Melkkos

Hier is ‘n vinnige luierige melkkosresep – maar dit is steeds lekker. Dit behoort so 15 minute te duur om alles klaar te maak van begin tot end. Sowaar!

Kook 2 liters melk.
Sif 1 k koekmeel en 1 t sout saam. Loer dat die melk nie oorkook nie.
Vryf 1 E sagte botter met die vingerpunte by die meel in (botter is nie margarien nie) sodat dit frummels maak.

Voeg die frummels geleidelik by die kokende melk terwyl daar gedurig geroer word. Daar sal klonte vorm, maar hou net moed. Sit die deksels skuins op en prut vir ongeveer 8 minute.
Klaar!
Skep op in bakkies en bedien met kaneelsuiker. Voeg klontjies botter by as jy nie gepla is van cholesterol nie. (ag net die ou een keertjie, dis so lekker).

 

Dine van Zyl