Suretha se skuimpoeding met meringue
Suretha vertel: “As kind het my ma hierdie skuimpoeding baie vir ons gemaak. Ons was ’n gesin van 6 en ons kinders was gedurig honger. My ma het altyd gesê dat ons hol van binne is. Hierdie poeding lyk baie groot, maar is lekker lig. Baie ekonomies en heerlik.”
|
Bestanddele
Skuimpoeding
- 1 blikkie ingedampte melk (hou koud in die yskas)
- 1 pakkie jellie (enige geur)
- 1 k kookwater
Meringue-ringe
- 1 k strooisuiker
- 1 eierwit
- 1 t bakpoeier
- 1 e asyn
- 2 e kookwater
Instruksies
Skuimpoeding
- Maak die pakkie jellie met die kookwater aan en roer tot alle suiker opgelos is.
- Bêre die jellie in die yskas om koud te word – dit moenie heeltemal stol nie, moet nog loperig wees.
- Klits die ingedampte melk in jou menger met die klitsspaan.
- Terwyl die ingedampte melk klits, gooi die jellie by en klits tot stywe punte vorm.
- Gooi in ’n glasbak uit en bêre in die yskas.
- Bedien saam met meringue-ringe.
Meringue-ringe
- Meng alle bestandele saam en klits tot styf.
- Die meringue moet sulke stywe punte maak.
- Voordat jy die meringue in die spuitsak sit, verf met ’n kwassie kleursel aan die binnekant van die sak (enige kleur of kleure wat jy graag wil hê).
- Sit die spuitsak in ’n beker om stewig te staan en skep die meringue daarin.
- Plaas bakpapier op jou bakplaat sodat die skuimpies nie vassit nie.
- Spuit punt-meringues of ’n e-vorm om klein bolletjies te vorm waarmee jy ’n ring om die skuimpoeding kan pak.
- Sit meringue-skuimpies in die oond en skakel die oond af.
- Laat skuimpies droog bak vir 1 tot 2 ure of laat deur die nag in die oond koud word.
Sit aanmekaar
- Haal jou glasbak met skuimpoeding uit die yskas en plaas dit op ’n mooi bord of staander.
- Pak die skuimpies in ’n sirkel om die glashouer en versier soos jy dit verkies. Dien op en geniet.
