Suikervrye Paas-babka met ’n sjokoladevulsel
Maak: 1 groot brood
Bereidingstyd: 30 minute, plus rystyd
Baktyd: omtrent 1 uur
Oondtemperatuur: 190 °C
• 190 ml warm melk
• 10 g-sakkie aktiewe droë gis
• 2 ekstra-groot eiers, teen kamertemperatuur
• 410 g (750 ml) koekmeel, plus ekstra vir knie
• 3 ml steviapoeier
• 185 g (200 ml) ongesoute botter, in blokkies van 2 cm gesny en gelos om kamertemperatuur te bereik
• 100 g suikervrye sjokolade, baie fyn gekap
• 30 ml fyn kaneel
• 1 eiergeel
• 30 ml melk
1 Gooi die warm melk in ’n bak en sprinkel die gis en ’n knippie suiker bo-oor. Laat dit vir 15 minute staan of tot dit begin skuim.
2 Klits die eiers, gooi dit by die gismengsel en klits weer om alles te meng.
3 Meng die meel, 2,5 ml stevia en 2,5 ml sout in ’n groot bak. Gebruik ’n elektriese menger met ’n spaanklitser, of ’n elektriese handklitser. Voeg die gismengsel by die meelmengsel en klop dit teen ’n lae spoed tot amper al die meel ingewerk is. Skakel nou oor na ’n deeghaak.
4 Voeg 150 g (160 ml) botter by en klits dit tot die meelmengsel en die botter goed gemeng is en ’n gladde, sagte deeg vorm. Die deeg moet effens klewerig wees.
5 Sit die deeg op ’n werkoppervlak wat liggies met meel bestrooi is. Knie dit vir ’n paar minute, tot die deeg minder klewerig en glad is. Sit die deeg in ’n gesmeerde bak en bedek dit met ’n klam doek. Laat dit vir omtrent ’n uur op ’n warm plek rys, of tot dit dubbel die volume is.
6 Meng die sjokolade, 0,5 ml stevia en kaneel saam. Voeg die orige botter by en meng goed.
7 Klits die eiergeel en melk saam om ’n glaseersel te vorm.
8 Druk die deeg plat en laat dit vir vyf minute onder ’n doek rus. Strooi ’n lekker dik laag meel oor jou werkoppervlak en rol die deeg in ’n vierkant van 30 x 30 cm uit – die deeg moet omtrent 3 mm dik wees. Verf die rande met eierglaseersel en sprinkel die sjokoladevulsel oraloor die deeg met ’n randjie van 1 cm reg rondom oop.
9 Rol die deeg soos ’n rolkoek op. Knyp die punte saam om dit te seël en draai die rol vyf of ses keer. Bring die punte byeen en knyp dit saam. Draai die rol twee keer en sit dit in ’n gesmeerde broodpan met die punte onderin. Bedek en laat vir 30 minute op ’n warm plek rys.
10 Verf die babka goed met eierglaseersel en bak dit vir 45 minute in die verhitte oond. Verlaag die hitte tot 160 °C en bak dit vir nog 10-20 minute, of tot die babka ’n diep goudbruin kleur het. Laat dit vir 10 minute in die pan afkoel en keer dit dan uit op ’n draadrak om heeltemal af te koel.
Stevia is ’n groen blaarplant van Suid-Amerika, waar dit eeue lank gebruik is vir goeie spysvertering en om wonde mee te verbind. Dis deesdae in poeier- en vloeistofvorm te kry as ’n plaasvervanger vir suiker. Stevia het verskeie voordele, sê Sally-Ann Creed, ’n voedingkundige van Kaapstad. Dis kilojoule-vry én die veiligste opsie as dit by versoeters kom. Stevia is baie soet en jy het min nodig. Jy kan dit op sy eie gebruik, of die helfte van die suiker in ’n resep daarmee vervang. Stevia het ’n nasmaak as jy te veel gebruik – gaan dus spaarsaam te werk!
