peri-peri-hoender
Bestandele:
12 hoenderstukke
Peri-peri-sous
8knoffelhuisies, fyngekap
125ml olie
125ml druiwe-asyn (rooi óf wit)
125ml suurlemoensap
125ml water
1 sopie paprika-poeier (sopie = tot measure)
1 sopie rissie-poeier
1 sopie sout
’n Paar klein, sterk rooi brandrissies, fyn gekap
Meng ál die bestanddele vir die sous saam tot die sout opgelos is. Giet die peri-peri-sous oor die hoender of gooi die hoenderstukke in die marineerbak en rol rond totdat hulle ordentlik met sous bedek is. Dis nie nodig om al die sous te gebruik nie. Gooi dus eers ’n bietjie uit omdat jy dit nie weer sal kan gebruik nadat rou hoender daarin gelê het nie. ’n Plastieksakkie wat jy kan herseël, is ook ’n goeie plek vir vleis en marinade om mekaar beter te leer ken.
Bedek die bak, sit dit in die yskas en laat die hoender vir ’n paar uur of selfs oornag marineer. As jy wil, skep nou en dan van die marinade met ’n lepel oor die boonste hoenderstukke. Braai die hoenderstukke oor matige tot warm kole vir sowat 25 minute totdat dit gaar is. Hoender moet geen bloed in hom oorhê nie en die sap teen die been moet kleurloos wees. Die vel moet bros wees, maar nie gebrand nie (in die praktyk sal daar seker hier en daar ’n paar swart spikkels gekarameliseerde vel wees).
Terwyl jy braai, verf marinade of periperi-sous met ’n kwas oor die hoender. Moet nooit later as vyf minute voor die einde enige sous wat met die rou hoender in kontak was, oor die vleis verf nie – anders bederf jy jou maaltyd met rou hoendersap.
As jy al jou vleistermometer gekoop het, kan jy net sowel kyk wat die binnetemperatuur
van die dikste dele is. As dit 77 °C is, weet jy die hoender is gaar. Bedien die hoender met ekstra peri-perisous.
